Komunikado di prensa - 2 March 2011
Enkuentronan na bordo di Clipper Stad Amsterdam
Fundashon Willem4 ta presentá su plannan pa 2011
Willemstad, 2 di mart 2011 – Ayera Fundashon Willem4 a presentá su plannan anual di 2011 na bordo e barku Clipper Stad Amsterdam, ku resientemente a bin mara aki na Kòrsou. Tabatin tambe un bríndis ku alrededor di 200 representante di sektor komersial, gubernamental, di siensia i di enseñansa. Ayera tardi nan a trit e grupo di 'verkenner' nóutiko Mgr. Verriet riba un rekorido ekstenso riba e barku.
Ret fuerte
Bob Verburg, presidente di e fundashon lokal Willem4, a presentá e aktividatnan resien di e fundashon i e plannan pa e aña nos dilanti. Verburg: "Nos ta aktivo riba diferente área. Sin eksepshon tur nos inisiativanan tin komo meta pa reforsá e struktura sosial i ekonómiko den e paisnan kaminda nos ta aktivo." Aparte di Kòrsou, Fundashon Willem4 ta na Boneiru, Sint Maarten, Sürnam i Hulanda i den kurso dje aña aki tambe na Aruba. Olaf Wilders di e ofisina AEF Caribbean ku ta konsehá riba tereno di organisashon: "Resientemente nos a bira partner stratégiko di Willem4. Bo por detektá mesora kon fuerte e ret ta, tantu lokal komo regional. Tin hopi energia i un plataforma pa desaroyo nobo."
Progreso
Un di e inisiativanan ku na 2011 ta haña forma ta lantamentu di un Baseball Campus na Kòrsou pa desaroyá talento di beisbòl, tantu lokal komo internashonal. Verburg: "Esaki ta bira un sentro multifunshonal pa enseñansa, deporte i bienestar. E lunanan binidero nos ta pone un toke final na un business plan ekstenso i nos lo divulgá mas di e sitio." Ademas Fundashon Willem4 ta aktivamente envolví den lantamentu di e Maritime Academy Curaçao. "E organisashon aki su meta ta pa bira un laso di koperashon entre institutonan di investigashon i di enseñansa, empresarial i di gobièrnu ku e ophetivo pa reforsá e formashon i e infrastruktura di konosementu den e sektor marítimo", segun Verburg. HISWA, e organisashon sektoral pa empresa di deporte akuátiko na Hulanda, tambe ta envolví den e inisiativa aki.
Sentido di empresa i kompartí konosementu
Un ophetivo general di e fundashon ta pa stimulá sentido di empresario. Den e kuadro aki ta traha huntu entre otro ku e fundashon Hulandes Consularis. Verburg: "Un 'consularis' ta un èks empresario independiente i dirigente di Kòrsou, ku eksperensia, konosementu i ret di kontakto den diferente sektor. E ta un 'sparringpartner' riba nivel stratégiko ku ta respaldá empresario pa un periodo mas largu." Un di e presentenan na e bríndis pa forma un ret di kontakto tabata entre otro Albert Oegema, fundadó di Certa Legal: "Ku koperashon i kompartiendo konosementu i eksperensia ta konstruí i mantené un komunidat eksitoso. Progreso sin interkambio ta inimaginabel."
Kreashon di konosementu
Willem4 ta traha estrechamentu huntu ku TiasNimbas Business School na final di 2010 e tabata anfitrion pa un biahe di estudio di e kurso Executive Master of Management and Organisation. Miguel Goede, Rector Magnificus di UNA: "E koperashon entre Willem4 i TiasNimbas Business School ta kuadra hopi bon ku e ambishonnan di UNA pa bira un sentro regional pa kreashon di konosementu, esta e Knowledge Zone."
Tokante Fundashon Willem4
Willem4 ta un ret di konosementu, eksperensia i inspirashon ku e meta pa sostené inisiativanan ekonómiko, sosial i edukativo na e pais i áreanan ku awor òf den pasado a forma parti di Reino Hulandes.
www.willem4.nl