Komunikado di Prensa- 2 Nov-2010

BIAHE DI ESTUDIO ‘EXECUTIVE MANAGEMENT & ORGANISATION’ E AÑA AKI PA KÒRSOU

Willemstad – Pa promé biaha un delegashon di TiasNimbas Business School na Hulanda ku ta konsistí di partisipante (empresario, hefe i mènèdjer) i dosentenan superior, lo bishitá Kòrsou entre 6 i 13 di novèmber 2010. E bishita aki ta tuma lugá den kuadro di e módulo ‘International Business Systems’, ku ta enserá un enkuentro anual intensivo i práktiko entre partisipante i mènedjernan di kompanianan lokal di e pais kaminda nan ta di bishita. Un-ke-otro ta sosodé pa medio di un eksplorashon temátiko di e práktika di maneho denter di e organisashonnan partisipante, for di e perspektiva  di algun materia saká for di e programa ‘Executive Master of Management and Organisation’ (MMO). Ta trata aki di materianan riba tereno di merkadeo stratégiko, maneho di relashonnan humano, maneho di ehekushon profeshonal i maneho logístiko i di kadena.

TiasNimbas ta organisando e biahe di estudio for di 1994 i prinsipalmente ta ofresé partisipantenan e oportunidat pa verifiká, di un forma aktivo, den ki grado diferensianan kultural tin influensia riba maneho i organisashon di un kompania. Kada kultura ta eksperensiá por ehèmpel burokrasia, kolaborashon, komunikashon, kòntròl i responsabilidat na un manera diferente. Pues, ta di importansia pa averiguá si pensamentunan enkuanto maneho ta aplikabel en general, òf si nan ta keda influensiá pa netamente kustumber i tradishonnan lokal ku tin nan raisnan históriko. Un di dos meta tras di e biahe di estudio aki ta pa sondeá kon por krea relashonnan duradero entre e partidonan enbolbí i buska oportunidatnan favorabel pa hasi negoshi.

Eksperensianan durante e biahe di estudio último añanan a mustra ku tin un nesesidat pa un enbolbimentu aktivo i motivashon propio pa por anda ku tipo di problemanan asina. Pa e motibu ei e programa ta enfoká hopi riba un aserkamentu a base di un ‘business case’. Den e kaso aki un grupo di partisipante ta bishitá un organisashon spesífiko, kaminda ta interkambiá konosementu i eksperensia ku algun mènèdjer enkuanto algun  problema organisatorio i di maneho, i tambe enkuanto desaroyo i retonan ku ta topa na e sitio. Na final di e siman e partisipantenan ta dokumentá  resultado di e bishitanan den un rapòrt komprimí, i pone esaki na disposishon di e anfitrionnan di Kòrsou, komo kontra-prestashon.

E biahe di estudio pa Kòrsou ta resultado di un resien aliansa entre TiasNimbas i Fundashon Willem 4. Fundashon Willem 4 ta un ret di konosementu, eksperensia i inspirashon. Meta ta pa sostené inisiativanan ekonómiko, sosial i edukativo den e paisnan, respektivamente teritorionan, ku ántes i aktualmente ta forma parti di Reino Hulandes. Ku realisashon di un kolaborashon pa loke ta strategia i ehekushon di e proyekto di TiasNimbas, Fundashon Willem 4 ta konkretisá su esfuerso primario pa konektá kalidat i ekspertisia di negoshi, empresario i partikulirnan, i alabes fundashonnan, instansianan gubernamental i institushonnan di konosementu na Kòrsou den algu berdadero.

TiasNimbas Business School ta forma parti di Universidatnan di Tilburg i Eindhoven i ta para garantia pa un estudio internashonal i prominente (un di esnan mas grandi na Hulanda), dirigí riba ofresementu di edukashon di alta kalidat riba nivel di maneho mas haltu na spesialista, mènèdjer i organisashonnan.  

Pa mas informashon tokante Fundashon Willem 4, e programa MMO di TiasNimbas i e biahe di estudio por tuma kontakto ku Sra. Melinda Domacassé na 738-5848. Tambe por manda un E-mail na This e-mail address is being protected from spambots. You need JavaScript enabled to view it òf por bishitá e wèpsait www.willem4.nl.

FIN